En decembro de 2022, fixéronse 30 anos da catástrofe do Mar Exeo. Cru pretende establecer un espazo de diálogo entre a traxedia e a veciñanza da Coruña co fin de “reflotar” unha realidade histórica, ambiental e social esquecida por algunhas persoas e aínda descoñecida por outras.
“O cronista que narra os acontecementos sen facer distincións entre grandes e pequenos dá conta dunha verdade, a saber, que para a historia nada do que unha vez aconteceu ten que darse por perdido”.
Walter Benjamin
O proxecto está conformado por tres eixos: unha cartografía emocional, varias mostras, un mapa interactivo e unha peza audiovisual.
Cartografía emocional
Coa cartografía emocional indagamos nas historias de vida de persoas (de distintas idades e xéneros e con oficios diversos) que se puideron ver afectadas no decembro do 92 (emocional, social e/ou economicamente).
Mostras
A mostra inaugural tivo lugar a partir do mes de decembro de 2022 no Aquarium Finisterrae da Coruña, albergando os resultados da cartografía emocional acompañados por esculturas de Emile e por restos do Mar Exeo. Un imaxinario colectivo sobre as feridas que aínda hoxe continúan abertas que tivo unha segunda exposición na Facultade de Ciencias da Educación da Universidade da Coruña.
Peza audiovisual
A peza audiovisual L’archéologue (O arqueólogo) xira arredor do proceso creativo de Emile Gireau, escultor francés cuxo obradoiro está situado no barrio de Monte Alto da Coruña. Gireau emprega, como materia prima da súa obra artística, restos do buque que continúan polo litoral.
Cru conta coa financiación do Concello da Coruña, a través dos Museos Científicos Coruñeses (Concellería de Cultura) e da Universidade da Coruña (Vicerreitoría de Igualdade, Cultura e Deporte) e co apoio de World Wildlife Fund España e Buceo Galicia. Ademáis, a peza audiovisual, financiada cunha campaña de crowdfunding en Verkami, recibiu 60 achegas de mecenas.